Nigrán, 23 de Xuño de 2021. Un novo festival de verán nacerá este mes de xullo para aumentar a oferta cultural do verán nas Rías Baixas. Trátase do EsPazoFest, un certame que se desenvolverá desde o 23 de xullo ata finais de agosto, en tres históricos pazos situados no Concello de Nigrán, o Pazo de Cea, o Pazo de Urzáiz e o Pazo de Touza.
Un total de seis artistas están xa confirmados no cartel do `Espazo Fest ́. No vindeiro mes de xullo están xa pechadas as actuacións de Taburete (23 de xullo), Carlos Sadness (30 de xullo) e Iván Ferreiro (31 de xullo). No mes de agosto pasarán polo `Espazo Fest ́, Marlango (5 de Agosto), Coque Malla (14 de agosto), e M Clan (27 de Agosto), pero están previstas aínda novas incorporacións que se confirmarán nos vindeiros días.
Música, patrimonio, cultura
EsPazoFest é un evento que nace cunha dobre vocación. Dunha banda, ofrecer unha experiencia diferente nas espléndidas fincas de cada pazo. Doutra banda, achegar ó público un excepcional patrimonio ás veces totalmente descoñecido. O festival está concebido para que os asistentes poidan desfrutar de actividades diversas e degustacións gastronómicas nas horas previas e durante a actuación principal.
Deste xeito, trata de dar un novo concepto á idea das actuacións de La Fiesta, desenvolvidas en veráns pasados no Pazo de Cea, que foi a orixe deste proxecto.
Estas actividades, entre as que haberá videoinstalacións, performances e actuacións musicais de pequeno formato acompañadas de gastronomía, estarán pensadas para permitir que o público faga un percorrido nas fincas dos pazos -habitualmente pechadas- e poida descubrir xoias do noso patrimonio. Atoparase, así, desde árbores senlleiras do patrimonio botánico como camelias e magnolios centenarios, ata fontes blasonadas, pasando por hórreos señoriais, capelas ou lagares onde se facía viño hai xa máis de douscentos anos.
Todos os concertos terán lugar ó aire libre en espazos acondicionados para acoller arredor de 1.000 persoas sentadas, co distanciamento requerido e todas as medidas de seguridade.
As entradas para os concertos están á venda a partir deste mércores, 23 de xuño, na billeteira electrónica www.teuticket.com e os prezos oscilarán entre os 25 euros para os concertos de Carlos Sadness e Marlango e os 30 euros para as citas de Taburete, Iván Ferreiro,
Coque Malla e M Clan. As persoas que merquen as 250 primeiras entradas de cada concerto terán un desconto de 5 euros en cada entrada.
EsPazoFest é unha iniciativa da productora OÍDE (Organización de Ideas de Éxito) e conta coa colaboración do Concello de Nigrán. O festival está dirixido por María Baltar, coa que colaboran Mariqui Cominges e Nuria Cervera, xerentes do Pazo de Cea e do Pazo de Touza respectivamente.